தேர்தலில் போட்டியிட சீட் வாங்கித் தருவதாகக் கூறி ரூ.4.50 கோடி பெற்றுக் கொண்டு பண மோசடியில் ஈடுபட்டதாக அதிமுக முன்னாள் அமைச்சர் சி. விஜயபாஸ்கருக்கு எதிராக சென்னை உயர் நீதிமன்றத்தில் மனுத்தாக்கல் செய்யப்பட்டுள்ளது. ஆலங்குடி தொகுதிக்கான அதிமுக வேட்பாளரான தனவிமல் என்பவர் தாக்கல் செய்துள்ள அம்மனுவில், “சீட் வாங்கித் தருவதாகக் கூறி சி. விஜயபாஸ்கர் என்னிடம் ரூ.4.50 கோடி பெற்றார்.
ஆனால், அதில் ரூ.50 லட்சத்தை மட்டுமே அவர் இதுவரை திரும்பக் கொடுத்துள்ளார். மீதமுள்ள ரூ.4 கோடியைத் திருப்பித் தருமாறு கேட்டபோது, அவர் எனக்குக் கொலை மிரட்டல் விடுக்கிறார். எனவே, அவர் மீது சட்டப்படி வழக்குப் பதிவு செய்து உரிய நடவடிக்கை எடுக்க காவல்துறைக்கு உத்தரவிட வேண்டும்” எனக் குறிப்பிட்டுள்ளார். இப்புகார் அரசியல் வட்டாரத்தில் பெரும் பரபரப்பை ஏற்படுத்தியுள்ளது.