மலைகளின் இளவரசியான கொடைக்கானலுக்குத் தற்போது கோடை விடுமுறையை முன்னிட்டுத் தமிழகம் மட்டுமின்றி அண்டை மாநிலங்களிலிருந்தும் ஆயிரக்கணக்கான சுற்றுலாப் பயணிகள் வருகை தந்த வண்ணம் உள்ளனர். நட்சத்திர ஏரியில் படகு சவாரி செய்தும், பைன் மரக்காடுகள் மற்றும் பசுமைப் பள்ளத்தாக்கு போன்ற இடங்களின் இயற்கை அழகை ரசித்தும் பயணிகள் மகிழ்ந்து வருகின்றனர். அதே சமயம், வரும் சட்டமன்றத் தேர்தலை முன்னிட்டு திண்டுக்கல் மாவட்டத்தின் முக்கிய சாலைகளில் ஐந்து பறக்கும் படையினர் தீவிர வாகன சோதனையில் ஈடுபட்டு வருகின்றனர்.
இந்தச் சூழலில், தென்காசி நாவலூர் பகுதியிலிருந்து நான்கு இளைஞர்கள் ஒரு தார் (Thar) வாகனத்தில் கொடைக்கானலுக்குச் சுற்றுலா வந்துள்ளனர். வெள்ளி நீர்வீழ்ச்சி அருகே பறக்கும் படையினர் அவர்களின் வாகனத்தை நிறுத்தச் சொல்லியும், அவர்கள் நிற்காமல் வேகமாகச் சென்றுள்ளனர். இதனால் சந்தேகமடைந்த அதிகாரிகள் உடனடியாகக் காவல்துறையினருக்குத் தகவல் கொடுத்தனர். விரைந்து செயல்பட்ட போலீஸார் சீனிவாசபுரம் பகுதியில் அந்த வாகனத்தை மடக்கிப் பிடித்து அதிரடிச் சோதனையில் ஈடுபட்டனர்.
அந்த வாகனத்தைச் சோதனை செய்தபோது அதற்குள் ஒரு துப்பாக்கி இருப்பதைக் கண்டு காவல்துறையினர் அதிர்ச்சியடைந்தனர். உடனடியாக வாகனத்தையும் துப்பாக்கியையும் பறிமுதல் செய்த போலீஸார், அந்த நான்கு இளைஞர்களையும் பிடித்துத் தீவிர விசாரணை நடத்தினர். இந்தச் சம்பவம் கொடைக்கானலில் பெரும் பரபரப்பை ஏற்படுத்திய நிலையில், இறுதியில் அந்தத் துப்பாக்கி ஒரு ‘டம்மி’ துப்பாக்கி என்பது விசாரணையில் தெரியவந்தது. இருப்பினும், தேர்தல் நேரத்தில் அதிகாரிகளின் உத்தரவை மீறிச் சென்ற இளைஞர்களின் செயல் அப்பகுதியில் சலசலப்பை ஏற்படுத்தியுள்ளது.