ஹார்முஸ் நீரிணையில் நிலவி வரும் கடல்வழி முற்றுகையை மீற முயன்ற ஈரானின் ‘டூஸ்கா’ (Tooska) என்ற பிரம்மாண்ட சரக்குக் கப்பலை அமெரிக்க கடற்படை அதிரடியாகத் தடுத்து நிறுத்திக் கைப்பற்றியுள்ளது. ஓமன் வளைகுடா பகுதியில் ரோந்து பணியில் ஈடுபட்டிருந்த அமெரிக்காவின் ‘USS SPRUANCE’ ஏவுகணை அழிப்புக் கப்பல், சுமார் 900 அடி நீளம் கொண்ட டூஸ்கா கப்பலை நிறுத்தும்படி எச்சரித்தது. ஆனால், ஈரானிய மாலுமிகள் இந்த எச்சரிக்கையைப் பொருட்படுத்தாமல் முன்னேற முயன்றதால், அமெரிக்கக் கப்பல் டூஸ்காவின் இயந்திர அறை மீது தாக்குதல் நடத்தி அதைக் கடலின் நடுவிலேயே முடக்கியது. தற்போது அமெரிக்க ‘மரைன்ஸ்’ வீரர்கள் கப்பலுக்குள் புகுந்து தீவிர சோதனையில் ஈடுபட்டு வருகின்றனர்.
ஏற்கனவே அமெரிக்காவின் தடைப் பட்டியலில் இருந்த இந்தக் கப்பல், சட்டவிரோத நடவடிக்கைகளில் ஈடுபட்டு வந்ததாகக் கூறப்படுகிறது. தற்போது அமெரிக்க ராணுவம் இந்தக் கப்பலில் உள்ள பொருட்கள் குறித்து விரிவான ஆய்வுகளை மேற்கொண்டு வருகிறது. இதற்கு கடும் கண்டனம் தெரிவித்துள்ள ஈரானின் ‘காதம் அல்-அன்பியா’ ராணுவத் தலைமையகம், அமெரிக்காவின் இந்தச் செயலை “கடற்கொள்ளை” என்று சாடியுள்ளது. அமெரிக்காவின் இந்த அத்துமீறலுக்கு விரைவில் ஆளில்லா விமானங்கள் (Drones) அல்லது ஏவுகணைகள் மூலம் நேரடி பதிலடி கொடுக்கப்படும் என்று ஈரான் பகிரங்க எச்சரிக்கை விடுத்துள்ளது.
உலக வர்த்தகத்தின் முக்கியப் பாதையான ஹார்முஸ் நீரிணையை மூடுவதாக ஈரான் ஏற்கனவே அறிவித்துள்ள நிலையில், தற்போதைய சூழல் மேலும் சிக்கலாகியுள்ளது. அமெரிக்காவிற்கு ஆதரவான நாடுகளின் கப்பல்கள் இந்தப் பாதையைக் கடப்பதைத் தடுக்க, ஈரான் கடல் பகுதியில் கண்ணிவெடிகளைத் தூவவோ அல்லது துப்பாக்கிச் சூடு நடத்தவோ வாய்ப்புள்ளதாகப் பாதுகாப்பு வல்லுநர்கள் கருதுகின்றனர். இந்த மோதல் வளைகுடா பிராந்தியத்தில் ஒரு பெரிய போர் மேகத்தைச் சூழ்ந்துள்ளதோடு, சர்வதேச கச்சா எண்ணெய் விநியோகத்தையும் கடுமையாகப் பாதிக்கும் அபாயத்தை ஏற்படுத்தியுள்ளது.
அமெரிக்கா மற்றும் ஈரானுக்கு இடையே நடைமுறையில் உள்ள தற்காலிகப் போர்நிறுத்த ஒப்பந்தம் வரும் ஏப்ரல் 22-ஆம் தேதியுடன் (புதன்கிழமை) முடிவுக்கு வருகிறது. இந்நிலையில், டூஸ்கா கப்பல் மீதான இந்தத் தாக்குதல் ஒப்பந்தத்தை நீட்டிக்கும் வாய்ப்புகளைத் தகர்த்துள்ளது. ஒப்பந்தத்தை நீட்டிக்க ஈரான் மறுக்கும் பட்சத்தில், இரு நாடுகளுக்கும் இடையே ஒரு முழு அளவிலான போர் மூளும் அபாயம் ஏற்பட்டுள்ளது. சர்வதேச நாடுகள் இந்த விவகாரத்தில் தலையிட்டு அமைதியை நிலைநாட்ட முயற்சிக்கும் முன்பே, நிலைமை கையை மீறிச் சென்று கொண்டிருக்கிறது.