தமிழக அரசியல் களத்தில் தவெக தலைவர் விஜய்யும், திமுகவின் உதயநிதி ஸ்டாலினும் எதிர் எதிர் துருவங்களாக அரசியலில் பரபரப்பை ஏற்படுத்தி வரும் வேளையில், உதயநிதியின் மனைவி கிருத்திகா உதயநிதி சில ஆண்டுகளுக்கு முன்பு அளித்த பேட்டி ஒன்று தற்போது சமூக வலைதளங்களில் மீண்டும் வைரலாகி வருகிறது.
அந்தப் பேட்டியில், சிம்பு மற்றும் விஜய் சினிமா துறைக்குள் அறிமுகமானபோது தனக்கு ஏற்பட்ட அனுபவங்களைப் பகிர்ந்து கொண்ட கிருத்திகா, “நடிகர் சிம்பு அறிமுகமானபோது ‘இவரெல்லாம் ஒரு ஹீரோவா?’ என என் நண்பர்கள் கேட்டார்கள், ஆனால் இவர் கண்டிப்பாக பெரிய ஆளாக வருவார் என நான் சொன்னேன்.
அதேபோல் நான் பள்ளி படித்துக்கொண்டிருந்தபோது விஜய் சினிமாவில் அறிமுகமானார். அப்போதும் அவர் மீது பல விமர்சனங்கள் முன்வைக்கப்பட்டன. ஆனால் ‘நீங்கள் வேண்டுமானால் பாருங்கள், இவர் நிச்சயம் பெரிய ஹீரோவாக வருவார்’ என நான் அவருக்கு ஆதரவாகப் பேசினேன்; அவர் அப்படியே வந்துவிட்டார்” என்று தெரிவித்திருந்தார்.
திரைத்துறையில் விஜய் நாயகனாக நடித்த ‘குருவி’ படத்தை உதயநிதி ஸ்டாலின் தயாரித்திருந்தார். தற்போது இருவரும் அரசியல் களத்தில் தீவிர எதிரிகளாக மாறியுள்ள சூழ்நிலையில், கிருத்திகாவின் இந்த பழைய பேட்டி இணையவாசிகளிடையே அதிக அளவில் பகிரப்பட்டு வருகிறது.