நிறுவனம் ஒன்றின் சிஇஓ (CEO) தனது மனைவி பிரசவித்த சில மணிநேரங்களிலேயே மருத்துவமனை படுக்கையில் அமர்ந்து அலுவலகக் கூட்டத்தில் (Work Call) பங்கேற்றதைப் பாராட்டி ஒரு பதிவைப் பகிர்ந்துள்ளார். தனது மனைவியின் அர்ப்பணிப்பையும், வேலையின் மீதான அவரது ஆர்வத்தையும் பெருமையாகக் குறிப்பிட்ட அந்தப் பதிவு, சமூக வலைதளங்களில் வைரலாகி பெரும் விவாதத்தை உருவாக்கியுள்ளது.
இந்த விவகாரம் இணையவாசிகள் இடையே இரண்டு விதமான கருத்துக்களை ஏற்படுத்தியுள்ளது. ஒரு தரப்பினர் அந்தப் பெண்ணின் உழைப்பையும் மன உறுதியையும் பாராட்டிய நிலையில், பெரும்பாலோர் இதற்கு கடும் எதிர்ப்பு தெரிவித்துள்ளனர். “இது அர்ப்பணிப்பு அல்ல, இது ஒரு நச்சுத்தன்மையான பணிச்சூழல்” (Toxic Work Culture) என்றும், பிரசவித்த பெண்ணுக்கு ஓய்வு தேவைப்படும் நேரத்தில் வேலையைத் திணிப்பது முறையல்ல என்றும் கருத்துக்களைப் பதிவிட்டு வருகின்றனர்.
வேலைக்கும் தனிப்பட்ட வாழ்க்கைக்குமான இடைவெளி (Work-Life Balance) குறித்த காரசாரமான விவாதங்கள் இந்தப் பதிவின் மூலம் மீண்டும் தொடங்கியுள்ளன. ஊழியர்களை இயந்திரங்களாகப் பார்க்காமல், அவர்களது உடல்நலம் மற்றும் உணர்வுகளுக்கு முக்கியத்துவம் அளிக்க வேண்டும் எனப் பலரும் அந்த சிஇஓ-வை விமர்சித்து வருகின்றனர். சாதனைகளைக் கொண்டாட வேண்டிய தருணத்தில், வேலையை முன்னிலைப்படுத்துவது ஆரோக்கியமான சமுதாயத்திற்கு அழகல்ல என்பதே பலரின் வாதமாக உள்ளது.