சீனாவுக்கு விழுந்த பலத்த அடி.. டிரம்ப் பயணத்திற்குப் பின் இந்தியா வந்த மார்க் ரூபியோ.. பின்னணியில் இருக்கும் ரகசியம்… கதறும் சீனா…!

அமெரிக்க வெளியுறவுத்துறை அமைச்சர் மார்க் ரூபியோ 4 நாட்கள் அரசுமுறைப் பயணமாக இந்தியா வந்துள்ளார். சர்வதேச அளவில் கைதேர்ந்த ராஜதந்திரியாக அறியப்படும் மார்க் ரூபியோவின் இந்தப் பயணம், உலக நாடுகளின் கவனத்தை ஈர்த்துள்ளது. குறிப்பாக, அமெரிக்க அதிபர் டொனால்ட் டிரம்ப் சமீபத்தில் சீனாவுக்குச் சென்று வந்த சில நாட்களிலேயே ரூபியோ இந்தியாவுக்கு வந்திருப்பது, ஆசியப் பிராந்தியத்தில் பெரும் அரசியல் நகர்வாகப் பார்க்கப்படுகிறது. புதுடெல்லியில் இன்று நடைபெற்ற முக்கிய ஆலோசனைக் கூட்டத்தில் பிரதமர் நரேந்திர மோடியை அவர் சந்தித்துப் பேசினார்.

இந்த உயர்நிலைச் சந்திப்பில் இந்தியத் தரப்பில் வெளியுறவுத்துறை அமைச்சர் எஸ். ஜெய்சங்கர், தேசிய பாதுகாப்பு ஆலோசகர் அஜித் தோவல் ஆகியோரும், அமெரிக்கத் தரப்பில் இந்தியாவிற்கான அமெரிக்கத் தூதர் செர்ஜியோ கோர் மற்றும் வெளியுறவுத்துறை துணைச் செயலாளர் ஆலிசன் ஹூக்கர் ஆகியோரும் கலந்துகொண்டனர். இரு நாடுகளுக்கும் இடையேயான வர்த்தக உறவுகள், பாதுகாப்பு ஒத்துழைப்பு மற்றும் அதிநவீன தொழில்நுட்பங்கள் (Critical Technologies) ஆகிய துறைகளில் கூட்டாண்மையை அடுத்த கட்டத்திற்கு எப்படிக் கொண்டு செல்வது என்பது குறித்து இருதரப்பும் விரிவாக விவாதித்தன.

இச்சந்திப்பு குறித்து எக்ஸ் (X) தளத்தில் பதிவிட்டுள்ள அமெரிக்கத் தூதர் செர்ஜியோ கோர், இந்த பேச்சுவார்த்தை மிகவும் பயனுள்ளதாக அமைந்தது என்று குறிப்பிட்டுள்ளார். மேலும், பாதுகாப்பு மற்றும் தொழில்நுட்ப மேம்பாட்டுடன் “சுதந்திரமான மற்றும் திறந்த இந்தோ-பசிபிக் பிராந்தியத்தை” (Free and Open Indo-Pacific) உருவாக்குவது குறித்தும் விவாதிக்கப்பட்டதாகக் கூறியுள்ளார். “அமெரிக்காவின் மிக முக்கிய கூட்டாளி இந்தியா!” என்று அவர் பெருமிதத்துடன் குறிப்பிட்டிருப்பது, இரு நாடுகளுக்கும் இடையிலான வியூக உறவின் ஆழத்தை வெளிப்படுத்துகிறது.

தூதர் செர்ஜியோ குறிப்பிட்ட ‘இந்தோ-பசிபிக் பிராந்தியம்’ என்பது உலக வர்த்தகத்தின் சுமார் 60 சதவீத கப்பல் போக்குவரத்து நடைபெறும் மிக முக்கியமான கடல் வழியாகும். தென் சீனக் கடல் மற்றும் இந்தியப் பெருங்கடல் பகுதிகளில் சீனா தனது ராணுவ பலத்தைப் பெருக்கி, செயற்கைத் தீவுகளை அமைத்து ஆதிக்கம் செலுத்த முயன்று வருகிறது. சீனாவின் இந்த அச்சுறுத்தலைத் தடுத்து நிறுத்தி, சர்வதேச கடல்சார் சட்டங்களின்படி அனைத்து நாடுகளும் சுதந்திரமாக வர்த்தகம் செய்வதை உறுதி செய்யவே இந்தியா, அமெரிக்கா, ஜப்பான், ஆஸ்திரேலியா ஆகிய நாடுகள் இணைந்து ‘குவாட்’ (QUAD) அமைப்பை வலுப்படுத்தி வருகின்றன. இந்தியாவின் இறக்குமதி-ஏற்றுமதி பாதுகாப்பு மற்றும் எல்லைப் பாதுகாப்பிற்கு அமெரிக்காவின் இந்த நட்பு மிக முக்கியத்துவம் வாய்ந்ததாகக் கருதப்படுகிறது.