அமெரிக்க அதிபர் டிரம்பின் சீனா சுற்றுப்பயணத்தின் போது, அவருடன் உலகப் பணக்காரர் எலான் மஸ்க்கும் பெய்ஜிங்கிற்குச் சென்றிருந்தார். அங்கு சீன கம்யூனிஸ்ட் கட்சி ஏற்பாடு செய்திருந்த ஒரு முக்கிய விருந்து நிகழ்ச்சியில் எலான் மஸ்க் கலந்துகொண்டார். அப்போது மஸ்க்கிற்குப் பின்னால் சாதாரண பணிப்பெண் (பணியாளர்) போல ஒரு பெண் நின்றுகொண்டிருந்தார். தற்போது அந்தப் பெண் சாதாரண ஹோட்டல் ஊழியர் அல்ல என்றும், அவர் சீன ராணுவத்தின் முக்கிய அதிகாரி என்றும் எழுந்துள்ள ஊகங்கள் உலகளவில் பெரும் விவாதத்தை ஏற்படுத்தியுள்ளன.
அவருக்குப் பின்னால் நின்ற அந்தப் பெண், சீன மக்கள் விடுதலை ராணுவத்தின் (PLA) ஒரு பட்டாலியன் கமாண்டரான மேஜர் ‘செங் செங்’ (Cheng Cheng) என அடையாளம் காணப்பட்டுள்ளார். இவர் சீன ராணுவத்தின் செயல்பாட்டு கையேடுகள் மற்றும் நடைமுறைகளை எழுதுவதில் மிக முக்கியப் பங்கு வகித்த உயர்பதவி அதிகாரி ஆவார். மேஜர் செங் செங் ராணுவ சீருடையில் இருக்கும் பழைய புகைப்படங்களையும், இந்த விருந்து நிகழ்ச்சியில் பணிப்பெண் உடையில் இருக்கும் புகைப்படங்களையும் ஒப்பிட்டு சமூக வலைத்தளங்களில் பலர் இந்த உளவு சந்தேகத்தைக் கிளப்பியுள்ளனர்.
மேற்கத்திய நாடுகளின் அரசியல் தலைவர்கள் மற்றும் எலான் மஸ்க் போன்ற முன்னணி தொழிலதிபர்களைக் கண்காணித்து, தங்களது வலைக்குள் வீழ்த்துவதற்காக சீனா இது போன்ற உளவு உத்திகளைக் கையாள்வதாகக் கருதப்படுகிறது. ஏற்கனவே ‘பாங் பாங்’ என்ற சீனப் பெண், கலிபோர்னியாவைச் சேர்ந்த முக்கிய அரசியல்வாதிகளை ‘ஹனிட்ராப்’ (Honeytrap) செய்து ரகசிய தகவல்களைப் பெற்றதாகக் குற்றச்சாட்டுகள் உள்ள நிலையில், தற்போது உலகின் நம்பர் 1 பணக்காரரான எலான் மஸ்க்கைக் கண்காணிக்க சீன ராணுவ மேஜரே பணிப்பெண்ணாக மாறியிருப்பது உலக அரங்கில் பெரும் பரபரப்பை ஏற்படுத்தியுள்ளது.