2026 ஏப்ரல் மாத ஐஎம்எப் (IMF) தரவுகளின்படி, இந்தியாவின் மொத்த உள்நாட்டு உற்பத்தி (GDP) 4.15 டிரில்லியன் டாலராக உள்ளதால், உலகப் பொருளாதார வரிசையில் இந்தியா தற்போது 6-வது இடத்திற்குச் சென்றுள்ளது. அமெரிக்கா, சீனா, ஜெர்மனி, ஜப்பான் மற்றும் இங்கிலாந்து ஆகிய நாடுகளுக்கு அடுத்தபடியாக இந்தியா உள்ளது. கடந்த பத்து ஆண்டுகளாக மலிவான கச்சா எண்ணெய் விலையால் பலன் பெற்ற இந்தியப் பொருளாதாரம், சமீபத்திய ஈரான் போர்ச் சூழலுக்குப் பிறகு சவால்களைச் சந்தித்து வருகிறது. இருப்பினும், இந்தியாவின் பொருளாதார வளர்ச்சி விகிதம் 6.48% ஆக உயர்ந்து, உலகின் மிக அதிவேகமாக வளரும் பொருளாதாரங்களில் ஒன்றாகத் திகழ்கிறது.
இந்திய ரூபாயின் மதிப்பு டாலருக்கு நிகராக சுமார் 15% வரை வீழ்ச்சியடைந்து, ₹96.90 என்ற அளவிற்குச் சரிந்துள்ளதால், டாலர் மதிப்பில் கணக்கிடப்படும் இந்தியாவின் தனிநபர் சராசரி வருமானம் பாதிப்பைச் சந்தித்துள்ளது. இதன் காரணமாக, 2026-ல் இந்தியாவின் பெயரளவு (Nominal) தனிநபர் வருமானம் 2,813 டாலராக இருக்கும் வேளையில், வலுவான ஏற்றுமதி வர்த்தகம் மூலம் தன் நாணய மதிப்பைத் தக்கவைத்துள்ள வங்காளதேசத்தின் தனிநபர் வருமானம் 2,911 டாலராக உயர்ந்து இந்தியாவை முந்தியுள்ளது. ஆனால், மக்களின் வாங்கும் சக்தியை அடிப்படையாகக் கொண்ட ‘பர்ச்சேசிங் பவர் பாரிட்டி’ (PPP) கணக்கீட்டில் இந்தியா (11,789 டாலர்), வங்காளதேசத்தைவிட (10,271 டாலர்) இன்னும் முன்னிலையிலேயே உள்ளது.
நாணய மதிப்பில் ஏற்பட்டுள்ள இந்தத் தொடர் சரிவு இந்தியப் பங்குச்சந்தையில் பெரும் தாக்கத்தை ஏற்படுத்தியுள்ளது. 2021 அக்டோபர் முதல் 2026 மே வரையிலான கடந்த ஐந்து ஆண்டுகளில், டாலர் அடிப்படையில் வெளிநாட்டு முதலீட்டாளர்களுக்கு (FII) இந்தியச் சந்தை எவ்வித லாபத்தையும் தரவில்லை (பூஜ்ஜிய லாபம்). ரூபாய் மதிப்பு வீழ்ச்சியால் தங்களின் முதலீட்டு மதிப்பு டாலர் கணக்கில் குறைவதைக் காணும் வெளிநாட்டு முதலீட்டாளர்கள், இந்தியச் சந்தையை விட்டுத் தொடர்ந்து தங்கள் மூலதனத்தை வெளியேற்றி வருகின்றனர்.